GVATEMALO - 25-an de aprilo, 2008.

La Indianoj de Gvatemalo fine disponas je sia propra televidkanalo, "TV Maya". Ĝi dissendas per la 23 Majaaj dialektoj de la lando kulturajn kaj informajn programojn, kiuj donas Majaan vidpunkton kaj proponas alternativon al la komercaj programoj. "Estis nia revo ekde multaj jaroj, ricevi amaskomunikilon, ĉar la amaskomunikiloj ekzistantaj neniam servis la miljarajn civilizaciojn, nek niajn opiniojn, nek la lingvajn zonojn", deklaris la Nobelpremiito pri paco 1992, Rigoberta Menchu, kiu ĉeestis la eklanĉon de la kanalo.

La televidkanalo proponas tri 30-minutajn elsendojn ĉiutage, Hispane subtitoligitajn, kiuj kaptiĝas nur en la Gvatemala ĉefurbo. La unua elsendo de la tago komenciĝas per programo montranta la signifon de la tago laŭ la Majaa kalendaro, kaj sekvas informa programo kaj alia dediĉata al infanoj. "TV Maya, la plurkultura kanalo de Gvatemalo", "La lumo, la voĉo kaj la bildo de la Majaoj", diras la sloganoj de tiu ĉi nova kanalo. Koloraj bildoj similaj al tiuj, kiuj ornamas la templojn de Tikal, kaj la Majaa kalendaro konsistigas la vidan aspekton.

"TV Maya bezonas subtenon ĉar por ĉi tiu unua jaro, la buĝeto atingas nur 2 milionojn da Kecaloj (263 150 Usonaj dolaroj), tial la programaro estas limigita", klarigas Pascual Domingo, prezidanto de la Akademio de Majaaj lingvoj de Gvatemalo. Ĉe la unua elsendo, la nova Gvatemala prezidento Álvaro Colom Caballeros asertis, ke li serĉos fontojn por certigi la financan longan daŭron de la kanalo. "Ni havas la respondecon trovi financojn por ke la kanalo restu seninterrompa, por realigi la malnovan revon de la Indianaj homoj de Gvatemalo", deklaris Sro Colom, kiu alvenis al potenco en januaro kun la anoncita objektivo doni novajn perspektivojn al la praloĝantoj de la lando.

Domingo Pascual esperas, ke en 2009 la programoj disvastiĝos kaj etendiĝos al ĉiuj Centramerikaj landoj kiuj dividas kun la sudo de Meksiko kaj Honduro la spurojn de la Majaa civilizacio, kiu spertis ĝian apogeon inter la 3-a kaj 10-a jarcentoj, kaj tiam malaperis pro la alvenon de la Hispanaj konkerintoj.