ARGENTINO - 13-an de majo, 2011.

La libra Babela Turo, giganta skulptaĵo 25 metrojn alta farita per 30.000 diverslingvaj libroj el ĉiuj mondopartoj kaj kreita de la argentina artisto Marta Minujín, estis hieraŭ oficiale inaŭgurita en la placo San Martín de Bonaero, argentina ĉefurbo.

La literatura maso estas aranĝita laŭ la formo de enorma spiralo kaj estis kreita de la famkonata plastika artistino okaze de la nomumo de Bonaero kiel Monda Libro-Ĉefurbo 2011-a fare de Unesko.

La originala Babela Turo estas priskribita en la Biblio, kie oni povas legi, ke la posteuloj de Noa, komencis konstrui turon en Ŝinar-ebenaĵo de Babilonio. Ili strebis konstrui tiel altan turon, ke ĝi povu atingi la ĉielon. Per sia pretendo, ili kolerigis Dion, tial Li decidis puni ilin kaj konfuzigis iliajn lingvojn por ke ili ne povu daŭrigi la konstruadon. De tiam homoj parolas en diversaj lingvoj. La mito verŝajne havis la celon klarigi, kial la homoj nuntempe parolas malsamajn lingvojn.

De tiu ĉi biblia historio la argentina artistino Marta Minujín ricevis la inspiron kaj prenis la ideon pri turo kaj lingvoj, kaj per sia mirinda talento elpensis el ĝi urban artaĵon: la Babelan Turon el libroj.

Ŝia arta instalaĵo havas provizoran karakteron. Ĝi estas starigita en urbocentra placo kiel unu el la ĉefaj logaĵoj de ĉi tiu jaro 2011-a, por kiu Bonaero estis elektita kiel Monda Libro-Ĉefurbo. La konstruaĵo de la argentina plastika artistino estas 25-metrojn alta kaj konsistas el 30.000 libroj diverslingvaj, reference al la biblia historio.

Por la realigo de tiel alta libra turo kontribuis landoj el la tuta mondo per diverslingvaj libro-donacoj. Delegacioj de Germanio, Sauda Arabio, Aŭstrio, Kubo, Belgio, Brazilo, Kanado, Ĉinio, Sudkoreio, Kostariko, Kroatio, Danio, Ekvadoro, Usono, Slovenio, Hispanio, Francio, Filipinoj, Finlando, Grekio, Nederlando, Hungario, Israelo, Italio, Japanio, Libano, Meksiko, Pakistano, Peruo, Pollando, Ĉeĥio, Rusio, Britio, Sirio, Sud-Afriko, Svislando, Tajvano, Urugvajo kaj multaj aliaj ne volis maltrafi la okazon partoprenigi sian lingvon en la instalaĵo. Ankaŭ la Internacia Lingvo Esperanto estas reprezentita en la artaĵo per kvin libroj, kiujn donacis la loka Esperanto-Asocio.

Vidu fotojn tie : Babela Turo

Dankegon al Pablo León kiu sendis al ni tiun artikolon