AŬSTRALIO - 20-an de julio, 2008.

La Papo alvokis al junuloj eviti la "spiritan dezerton" kiu laŭ li disvastiĝas tutmonden, fine de sia vizito al Aŭstralio. La Papo Benedikto la 16-a diris al amaso de proksimume 200 000 homoj ĉe la Mondaj Tagoj de la Junularo de la Katolika Eklezio, ke ili konstruu novan epokon sen avareco.

La mondo "bezonas renovigon", li diris, kaj petis al la junaj gepilgrimantoj esti agentoj de tiu ŝanĝo. Pli frue en la semajno, li pardonpetis por fitraktoj faritaj de katolikaj pastroj al junuloj. Li ankaŭ esprimis sian "honton" pri tiuj  pedofiliaj fitraktoj. La 81-jaraĝa pontifiko ĉeestis sensacian diservon fine de la sestaga junulara festo, kvankam la nombroj de ĉeestantoj al tiu granda diservo ne atingis la atenditajn 500 000 homojn. La Papo flugis per helikoptero super miloj da pilgrimantoj, el kiuj multaj pasigis la nokton subĉiele en malvarma vetero ĉe sidneja kurejo de Randwick prepare por la dimanĉaj eventoj.

Li tiame renkontis iujn fervorulojn, antaŭ ol celebri la grandan diservon. La Papo fine anoncis, ke la sekvantaj Mondaj Tagoj de la Junularo, en 2011, okazos en Hispanio, kaj promesis ilin ĉeesti. "Ĝis tiam, ni ankoraŭ preĝos unuj por la aliaj kaj ni ĝoje atestu por Kristo antaŭ la tuta mondo," li diris al pilgrimantoj, el kiuj multaj estis vojaĝintaj el la tuta mondo por veni al Aŭstralio.

Legu ankaŭ :

• "La Papo vizitas Aŭstralion" (13/07/2008)