AŬSTRALIO - 30-an de januaro, 2008.

La Aŭstralia registaro anoncas, ke ĝi publikigos sian unuan formalan pardonpeton al Aborigenoj kiam parlamento rekomencos labori venontmonate. La Ministrino pri Indiĝenaj Aferoj Jenny Macklin diris, ke la pardonpeto estos la unua afero pritraktata kiam la nova parlamento kunvenos je la 13-a de Februaro. Tio celos la "Ŝtelatajn Generaciojn", Indiĝenaj infanoj deprenitaj el iliaj gepatroj por esti edukataj de blankaj familioj.

Tio estis la "unua, necesa paŝo por antaŭeniri for de la pasinteco", ŝi diris. La Ĉefministro Kevin Rudd anoncis planon pri pardonpeto post lia venko pasintjare en la naciaj balotadoj. Tiu decido estas tre simbola, kaj markas definitivan rompon disde politikoj de la antaŭaj registaroj. Sinjorino Macklin diras, ke la enhavo de la pardonpeto estis pridiskutata post larĝa konsulto kun Aborigenaj gvidantoj. Tio fariĝos "en la nomo de la Aŭstralia registaro kaj ne kulpigos la aktualajn Aŭstraliajn generaciojn", ŝi diris en komunikaĵo. "Post kiam ni establos ĉi tiun respekton, la registaro povos kunlabori kun indiĝenaj komunumoj por plibonigi servojn celante mallarĝigi la 17-jaran vivesperan diferencon inter Indiĝenaj kaj neindiĝenaj Aŭstralianoj" ŝi diris.

Efektive, miloj da Indiĝenaj infanoj estis deprenitaj el iliaj gepatroj kaj alportitaj al blankaj familioj aŭ institucioj inter 1915 kaj 1969. La tiama politiko celis al asimilo inter Aborigenaj kaj blankaj komunumoj. Aborigenaj kampanjantoj estas serĉantaj miliardojn da dolaroj tutlande por kompenso de tiu politiko. Sed la registaro decidis forĵeti ĉi tiun ideon, kaj male promesis financi plibonigitan edukadon kaj sanzorgajn instalaĵojn por Indiĝenaj komunumoj.