USONO - 04-an de aŭgusto, 201..

La indiana tribo de Suquamish, en la usona nordokcidenta subŝtato de Vaŝingtonio modifis sian Konstitucion por leĝigi la geedziĝon inter samseksaj personoj, anoncis merkredon la 3an de aŭgusto la tribaj leĝaj reprezentantoj.

Tiu ĉi decido havas neniun leĝan valoron ĉe la federacia nivelo, nek ĉe la nivelo de la subŝtato de Vaŝingtonio, kiu ne agnoskas la samsekseman geedziĝon. Sed tio  tamen permesas al ĉiu Suquamish-ano samsekseme geedziĝi ene de la tribo. La teksto, defendita de juna lesba Suquamish-anino, estis aprobita lundon unuvoĉe de la 7 membroj de la triba konsilo, kiu kalkulas entute 1 050 membrojn.

"Ne estis diskutado inter la membroj de la tribo, kaj la plejaĝaj en nia komunumo subtenis la demandojn de la plej junaj", deklaris Michelle Hansen, advokatino de la Suquamish-anoj. "Estas tradicio ĉe ni esti malfermitaj, akcepti la malsamajn personojn", ŝi aldonis.

La temo pri samseksema geedziĝo multe estas en disputado en Usono, nunmomente kuras juĝa proceduro intencante leĝigi ĝin en Kalifornio kaj oni memoru la freŝdatan aprobon en la subŝtato de Nov-Jorkio. Sinjorino Hansen substrekis, ke la decido de la Suquamish-anoj koncernas nur la tribon.

"La tribo havas siajn proprajn leĝojn [ekde starigo de sia Konstitucio en 1965], sed ni ne povas garantii ke la mondo ĉirkaŭ ni dividas niajn valorojn. Estas tasko de la usona registaro agnoski [tiun tipon de geedziĝo]. Niaj leĝoj aplikiĝas nur ene de la tribo kaj al siaj membroj", ŝi deklaris.

La tribo Suquamish estas la dua en Usono kiu laŭleĝigas samsekseman geedziĝon, post tiu de la "Coquille" (Konko), en Oregono (Nordokcidento). Ses amerikaj subŝtatoj jam hodiaŭ agnoskas samsekseman geedziĝon : Vermonto, Konektikuto, Iovao, Nov-Jorkio, Masaĉuseco kaj Nov-Hampŝiro, al kiuj aldoniĝas la usona ĉefurbo, Vaŝingtono.

La samseksemaj geedziĝoj kontraktintaj en tiuj subŝtatoj tamen ne havas leĝan valoron ĉe la federacia nivelo, kie la leĝo nomita "Defendo de geedziĝo" kondiĉu, ke geedziĝo povas koncerni nur du personojn de malsama sekso.

Fonto : AFP