MEKSIKO - 20-an de aprilo, 2011.

Se vi ŝanĝas unu literon de la lingvonomo "Ayapaneco", vi povus kredi, ke temas pri neologismo de Esperanto. Fakte Ajapaneco estas pralingvo de Meksiko. Ĝi transvivis la konkeron de Meksiko fare de la Hispanoj, revoluciojn kaj naturajn katastrofojn, sed devas nun foraperi kiel parolata lingvo laŭ raporto en la brita gazeto Guardian.

Restas nur du parolantoj, kiuj praktike ne interparolas kvankam iliaj hejmoj distancas ne pli ol 500 metrojn. Al ambaŭ viroj, Manuel Segovia, 75 kaj Isidoro Velazquez, 69, multaj aferoj estas komunaj, diras observantoj.

Por kompilado de vortaro la manko de komunikado estas kompreneble obstakla. Jam aperis surloke engaĝitaj lingvistoj por savi kio ankoraŭ estas savebla. Restas ankaŭ parencoj kiuj komprenas tiun lingvon, kies origina nomo "Nuumte Otoo" signifas vera voĉo.

La provo transdoni la lingvon per kursoj fiaskis pro neintereso de la surloka publiko. Segovia raportas, ke li tiucele eĉ aĉetis krajonojn kaj notlibretojn. Jen bedaŭrinde trista fino de originala interpreto de la realo.

Prilaborita raporto de artikolo el Frankfurter Rundschau de Judit von Sternberg 16./17. de aprilo 2011, Germanujo