TURKIO / EŬROPA UNIO - 16-an de septembro, 2010.


La Eŭropa Unio perdis multe de sia populareco en Turkio. Turkoj deziras pli da kunlaboro kun la Islama mondo, laŭ la lasta ĉiujara opinisondo farita de la instituto Transatlantic Trends kaj publikigita de German Marshall Fund (GMF). En 2004, unu jaron antaŭ la malfermo de intertraktadoj por membriĝo de Turkio en la Eŭropan Union, 74 % el la Turkoj deklaris sin favoraj al membriĝo al la EU en opinisondo de GMF, dum en 2010, ili estas nur 38 %, laŭ ĉi tiu enketo.

Ĉi tiu enketo estis plenumita en Turkio, en Usono kaj en 11 landoj de la EU sur reprezentaro de 1 100 personoj. Kaj la nombro de sonditaj Turkoj kiuj asertas esti favoraj al pli mallarĝa kunlaboro de ilia lando kun la Islamaj ŝtatoj de Mezoriento duobliĝis inter 2009 kaj 2010, tio estas de 10 al 20 %.

Koncerne la atoman programon de Irano, 48 % el la Turkoj deklaras, ke ili ne maltrankviliĝas pri ĉi tiu programo. Okcidentaj landoj akuzas Iranon, ke ĝi volas fabriki atomajn armilojn, kaj Irano siaflanke asertas evoluigi programon kun nuraj civilaj celoj.

Eŭropanoj, cetere, daŭre restas tre dividitaj pri la membriĝo de Turkio en la EU : 38 % el la pridemanditoj estas favoraj al ĝi, kontraŭ 48 % kiuj ne estas.

La EU ekmalfermis intertraktadojn en 2005 kun la celo de la membriĝo de Turkio, sed la procezo ne plu antaŭeniras precipe pro la kontraŭstaro de pluraj landoj, inter kiuj Francio kaj Germanio, kiuj timas alvenon en la eŭropan klubon de granda lando de 73 milionoj da loĝantoj, preskaŭ ĉiuj islamanoj.

Ĉi tiu enketo okazas dum usonaj kaj eŭropaj gvidantoj maltrankviliĝas pri la sinteno de Turkio, kiu laciĝas pro la malrapideco de la membriĝoprocezo, kaj sin turnas al najbaraj Islamaj landoj, precipe Irano.

Tamen, se oni komparu, 38% restas favoraj al EU dum nur 20% estas favoraj al pli da proksimeco kun Islamaj najbarlandoj.

Fonto : AFP