BOCVANO - 19-an de oktobro, 2009.

La ĉefjuĝisto de Bocvano anoncas, ke la reganta Demokrata Partio de Bocvano gajnis la parlamentan balotadon. La venko alportas al la prezidento Ian Khama aliajn kvin jarojn da regado en la plej granda diamantoproduktisto de la mondo. La DPB ĝis nun gajnis 36 de la 57 seĝoj, kun la kalkulo kompleta en 45 voĉdonaj distriktoj. La ĉefa opozicia partio, la Bocvana Nacia Fronto, kaj la Bocvana Partio de la Kongreso gajnis po kvar seĝojn. La DPB estas reganta ekde sendependeco en 1966.

Legu ankaŭ : "Bocvano voĉdonas en nacia balotado" (16/10/2009)


GABONO - 19-an de oktobro, 2009.

Ali Ben Bongo faris la ĵuron de enoficiĝo kiel gabona nova prezidento, du monatoj post la ege disputata balotado. "Mi deziras Gabonon kie la elitoj cirkulas kaj estas renovigitaj," diris la filo de la iama delonga gvidanto Omar Bongo en sia inaŭgura parolado. La kontraŭstaro protestas post kiam Sro Bongo estis deklarita gajninto, instigante protestojn en kiu kelkaj homoj mortis. Sed lundon, la Konstitucia Tribunalo malakceptis la opoziciajn refutojn kaj proklamis la oficialajn rezultojn.

Legu ankaŭ : "Tumultoj en Gabono post elekto de nova prezidento" (05/09/2009)


RUANDO - 19-an de oktobro, 2009.

Ruanda doktoro estis maldungita de sia laborposteno en franca hospitalo pasintsemajne, post kiam flegistino eltrovis, ke li estas serĉata pro partopreno en genocido. Li protestis pri sia senkulpeco. Eugène Rwamucyo, kiun serĉas Interpol ekde 2006, diris, ke li estas viktimo de maljustico. La aŭtoritatuloj en Ruando asertas, ke la Dro Rwamucyo faris militkrimojn dum la genocido en 1994. La direktoro de la hospitalo en la norda franca urbo de Maubeuge deklaris, ke la tuta komunumo estas ŝokita. La serĉ-anonco de Interpol por Dro Rwamucyo estis publikigita de Ruando. Tio tamen ne estas internacia arestpeto sed tiela anonco bezonas, ke landoj kunlaboru por aresti la suspektaton cele al ekstradicio.